Hai historias que caben nunha páxina.
E outras que caben en apenas unhas liñas, pero permanecen na memoria durante moito tempo.
Desde AFIPRODEL Galicia convidámoste a participar no I Certame de Microrrelatos «Arr3quentando a Cultura», unha iniciativa que busca dar voz ao patrimonio cultural galego e ás historias que nacen arredor da economía circular, da memoria, dos oficios, dos saberes e das pequenas accións que manteñen viva a nosa identidade.
O reto é sinxelo: escribir un microrrelato en galego, de ata 150 palabras, que comece coas palabras «Eu son».
Hai categorías infantil, xuvenil e de persoas adultas, e os relatos seleccionados formarán parte dunha publicación dixital do proxecto, ademais de optar aos premios establecidos nas bases.
Prazo de presentación: ata o 10 de outubro de 2026.
Quizais a próxima historia que emocione a alguén poida escribirse en menos de 150 palabras.
E pode ser a túa.
BASES do CERTAME
A Asociación Finisterrae de Profesionais do Desenvolvemento Local de Galicia organiza este certame de microrrelatos dentro da iniciativa Arr3quentando a Cultura apoiada pola Deputación da Coruña a través do Programa F0203/2026, destinado a entidades sen fins de lucro para a realización de actividades culturais no 2026.
Arr3quentando a Cultura é un proxecto enfocado a recuperar, visibilizar e valorizar o patrimonio cultural inmaterial galego, explorando a súa conexión cos principios da economía circular. Pon en valor pequenas iniciativas do rural que manteñen viva unha cultura do coidado, do aforro e do aproveitamento. Ademais, fomenta a aprendizaxe interxeracional no marco do fortalecemento da identidade local e dos vínculos comunitarios.
- Quen pode participar?
- Poderán participar todas as persoas que o desexen, dentro das categorías establecidas na base 5ª.
- As persoas menores de idade deberán acompañar o microrrelato dunha autorización do pai, da nai ou da persoa titora legal.
- Que tipo de textos se poden presentar?
- Os relatos deberán estar escritos en lingua galega.
- Deben ser de autoría orixinal da persoa participante que os presenta.
- O tema debe versar sobre o patrimonio cultural (material e inmaterial) de Galicia relacionado coa economía circular e acorde coa definición do proxecto Arr3quentando a Cultura.
- Cada participante pode presentar un máximo de cinco microrrelatos.
- As obras terán unha extensión máxima de 150 palabras (co título incluído).
- O microrrelato debe estar escrito en Arial 12, con interlineado 1,5.
- O microrrelato debe empezar con “Eu son”.
- Como e onde se presentan os microrrelatos?
- Os microrrelatos enviaranse a afiprodel.org@gmail.com. No corpo da mensaxe do correo electrónico deberá indicarse a categoría á que optan, o nome e apelidos da persoa que presenta o traballo, e deberá facilitarse un teléfono de contacto. Se é o caso, poderase engadir un pseudónimo, de cara a identificar a autoría nas accións de comunicación e difusión.
- O microrrelato enviarase en PDF adxunto e neste documento deberá figurar o título e o texto. Non incluirá os datos de autoría.
- Quedarán eliminados os traballos sen identificación ou con identificación incompleta.
- A organización resérvase o dereito de non admitir a concurso os textos que, entre outras cousas, atenten contra o dereito á intimidade, a honra e a propia imaxe de terceiros/as, ou que conteñan connotacións racistas, sexistas e/ou discriminatorias, comentarios difamatorios ou calquera outro que atenten contra a dignidade.
- Cando se deben presentar?
O prazo de presentación estará aberto desde o 01/08/2026 e rematará o 10/10/2026.
- Que categorías hai?
- Infantil: ata os 11 anos (con data de referencia o 01/08/2026).
- Xuvenil: con idade comprendida entre os 12 e os 17 anos (con data de referencia o 01/08/2026).
- Persoas adultas: con idade igual ou superior aos 18 anos (con data de referencia o 01/08/2026).
- Que premios ou recoñecementos hai?
- Premio e recoñecemento ao mellor traballo na categoría infantil: un libro infantil con temática relacionada coa economía circular.
- Premio e recoñecemento ao mellor traballo na categoría xuvenil: un libro xuvenil con temática relacionada coa economía circular.
- Premio e recoñecemento ao mellor traballo na categoría de persoas adultas: un libro con temática relacionada coa economía circular.
- Os cinco mellores traballos en cada categoría recibirán un diploma acreditativo. Ademais, as persoas autoras serán convidadas a ler o seu microrrelato nun acto público.
- Os traballos admitidos no certame serán publicados nun libro dixital do proxecto.
- Quen estará no xurado?
- O xurado estará integrado por cinco persoas dos ámbitos do desenvolvemento local, da formación e da cultura.
- O xurado terá facultades plenas para decidir as persoas gañadoras e a súa decisión será inapelable. Poderá declarar deserto algún dos premios se así o considera.
- O xurado eliminará calquera relato que non sexa orixinal ou que detecte que foi elaborado, total ou parcialmente, con algún sistema de intelixencia artificial.
- Como se pode coñecer o resultado do certame?
- A decisión do xurado darase a coñecer a través da páxina da entidade convocante (www.afiprodel.org) e nas súas redes sociais.
- Afiprodel fará entrega dos premios nun acto presencial. As persoas premiadas deberán facilitar previamente unha copia do seu DNI para verificar os datos.
- Publicación
- A organización do certame publicará os microrrelatos seleccionados na súa páxina web durante dous anos dende a concesión do premio.
- Coa participación no certame, as persoas concursantes autorizan á organización, sen contraprestación ningunha e de maneira expresa, a reproducir (total ou parcialmente), comunicar publicamente (total ou parcialmente) e distribuír (total ou parcialmente) os seus microrrelatos en calquera forma ou soporte, para todo o mundo durante dous anos. A organización respectará, en todo caso, os dereitos morais que as persoas participantes posúan sobre as súas obras.
- Deseñarase un cartel cos relatos gañadores para difundir nas bibliotecas municipais a través dos departamentos de Desenvolvemento Local.
- Tratamento de datos persoais
En cumprimento do previsto na Lei Orgánica 3/2018, e na normativa europea, os datos das persoas participantes serán incorporados a un ficheiro responsabilidade de Afiprodel coa única finalidade de xestionar os premios desta promoción e de contactar coas persoas gañadoras. As persoas participantes poderán exercer os seus dereito de acceso, rectificación, oposición e cancelación mediante escrito ao correo electrónico afiprodel.org@gmail.com. Afiprodel comprométese a tratar en todo momento os seus datos de carácter persoal de forma absolutamente confidencial e de acordo coas finalidades previstas nas presentes bases.
- Observacións
- A organización do certame ten capacidade de decidir sobre a interpretación das bases en última instancia ou sobre a súa modificación no caso de erro, sendo a súa decisión inapelable.
- O feito de participar neste certame implica a total aceptación das súas bases.
