O Camiño de Santiago, como verdadeira “autovía do coñecemento” desde a Idade Media, simboliza un punto de encontro capital no desenvolvemento e o intercambio das diversas culturas que integran a identidade europea na que Galicia e o seu medio rural ten moito que dicir.

Baixo o convencemento de que as peregrinacións xacobeas, como torrente de intercambio cultural entre Galicia e o resto de Europa, poden ser así un elemento estratéxico para o desenvolvemento sustentable, partimos da premisa de que o Camiño actúa hoxe en día como elemento vertebrador para a dinamización socioeconómica e cultural dos espazos rurais e rururbanos polos que se desenvolve.

O Turismo adquire cada vez maior importancia como motor dinamizador dunhas zonas rurais que, inmersas nun proceso de despoboación progresiva pola terciarización, dispoñen dunha enorme concentración de patrimonio  natural e cultural cun grande potencial de desenvolvemento. 

A proposta oriéntase ao reto de promover a cultura científica e a innovación no Camiño de Santiago a través da divulgación, o debate, exposicións, obradoiros, etc. e converter así a Galicia nun punto de encontro e espazo de reflexión creativa ao servizo da sociedade sobre os obxectivos de desenvolvemento sustentable e o impulso cultural, creativo e turístico dos municipios rurais xacobeos